أقلام الثورة 21/11/2016لا توجد تعليقات
الكاتب: أحمد محسن

اللي حصل ان النوبيين جمعوا نفسهم من كام يوم في ميكروباصات وعربيات نقل ولفوا على اكثر من 44 قرية نوبية تحت عنوان حملة طرق الابواب لـ ( منع بيع الاراضي النوبية في المزاد العلني ) أو ( أرمنا فو رقنري نوبية ) باللغة النوبية .. وقدروا يجمعوا من اهالي القرى عدد كبير وقطعوا بيهم سكة القطر من القاهرة لأسوان عند مركز ( دارو ) .. وكمان قطعوا طريق ابو سمبل الدولي ومعاه الطريق قدام قرية ( الكرور ).. والشرطة ضربت عليهم نار واتصاب شابين نوبيين بالرصاص الحي .. ده غير تصعيد على المستوى السياسي من ( محمد عزمي ) رئيس الاتحاد النوبي ودعمه بعدد من اعضاء مجلس الشعب ومعهم محافظ اسوان .. ده غير اجتماع موسع لكامل شيوخ قبائل النوبة لبحث الية ضد قرار الحكومة المصرية بطرح ارضهم في قرعة مشروع المليون ونص فدان .

مراجع لتسلسل الأحداث 

http://thawra.in/2vYQt

http://thawra.in/0LuBA

http://thawra.in/xSBw8

http://thawra.in/9EDK0

http://thawra.in/KLGGV

حد فهم حاجة ؟ .. لأ .. طيب ناخدها واحدة واحدة .. في اوائل 2014 اعلن السيسي عن مشروع كبير لاستصلاح الاراضي الزراعية اسمه ( المليون ونص فدان ) .. هدف المشروع هو توسعة الرقعة الزراعية لزيادة المحاصيل وتحقيق الاكتفاء الذاتي من الغذاء .. والمشروع اتعمل له خريطة كبيرة للاراضي المستهدفة جابت مصر بطولها وعرضها لكن اكثر الاماكن في الصحراء الغربية ومنها طبعا مناطق النوبة .. طيب لحد كده حلو .. امال ايه اللي يزعل ؟ * مرجع المشروع وخريطته : http://thawra.in/jr292

اللي يزعل ان النوبيين اتفاجأو ان جزء كبير من اراضيهم المأهوله بالسكان تم وضعها في الخريطة دي .. كده غصب واقتدار .. طب الناس هتروح فين ؟ .. السيسي صدر امر اجلاء بالقوات المسلحة اسمه ( اخلاء التعديات على اراضي الدولة خصوصا عند مجاري السيول )

مرجع الاراضي النوبية بكراسات المشروع : http://thawra.in/17wqe

مرجع اخلاء التعديات : http://thawra.in/1MehV

طب فيه حاجة تزعل تاني .. اه فيه .. بنود المشروع المنشورة بجريدة الاهرام بتقول ان 20 % فقط للمصريين .. 80 % للاستثمار العربي والاجنبي .. وصاحب شركة ( الريف المصري ) اللي الدولة موكلاها ببيع الاراضي قال لفظ جميل اسمه ( السياحة الزراعية ) عشان القعدة تحلو ويبقى عليها صبغة غطاء دولي محترم للتفريط في الارض .. ومن ضمن البنود فتح المشروع للانتفاع لمدة 30 سنة فهيخليه اشبه بالاحتلال .. وده لاي دولة على فكرة لان البنود مفيهاش دول محظورة .. وباللذات ان المساحات المطروحة كبيرة .. واللي يخوف ان احنا بعون الله بقينا مطبعين مع احقر اهل الارض من الصهاينة واعوان اعوانهم !!

مرجع بنود المشروع ونسبة المصري للاجنبي : http://thawra.in/3uUDw
مرجع مؤتمر شركة الريف المصري : http://thawra.in/cVnMI

نرجع لحبايبنا النوبيين .. اهالي النوبة الكرام من اكثر شعوب العالم سلام وطيبة .. وللاسف استحملوا التهجير من قراهم البسيطة كذا مرة وفي مختلف العهود، حصل في سنة 1902 ببناء الانجليز لخزان اسوان وغرقت كذا قرية .. وحصل في 1912و في 1933 لما قاموا بتعلية الخزان وغرقت شوية قرى كمان .. وحصل في سنة 1962 في عهد جمال عبد الناصر وبناء السد العالي فتم التهجير لغالب الاهالي. ( يعني المرة دي مكنش السبب التهجير قد ما السبب هو عدم الشعور بالثقة في الدولة على اراضيهم التاريخية ، وان ممكن يبيعوها لاي حد ) . خصوصا وانهم استهلكوا محاولتهم السلمية مع الدولة من خلال طلبات احاطة لمجلس الشعب ومجلس الوزراء ورسائل للسيسي رأسا وكان الرد اللولبي ان الاولوية للتملك هو لاهالي النوبة .. يافرحتي .. تبقى ارضي وتبيعهالي !!! * مرجع التواريخ :  http://thawra.in/E41Ka     http://thawra.in/kVSe2

مرجع قرار الاولوية للنوبيين : http://thawra.in/prSeo

نرجع لمشاريع النوبة بقى .. أي مشروع اتعمل قبل كده في بلاد النوبة ومتمش التنسيق معاهم اثبت فشل ذريع بالرغم من كل الجهود المبذولة .. اخرهم مشروع ( توشكى ) بتاع برنامج صباح الخير يامصر .. وعايزينها تبقى خاضراه الارض اللي في الصاحراه .. المشروع اللي اتحفر فيه ترعة الشيخ زايد بطول 50 كيلوا وانشاء محطة مبارك الضخمة للرفع وتم التنفيذ بنسبة 100 % .. وكان الهدف الاكبر هو اتاحة فرص عمل كبيرة للشباب وتوسعة الرقعة الزراعية وزيادة المحاصيل برضه .. * ساعتها شباب كتييير جدا راح هناك .. لكن الصعوبات الكبيرة اللي واجهوها في الانتقال في الصحراء وبمسافات بتوصل لـ 500 كيلوا .. فتم فشل المشروع .. فبدأ عمنا مبارك – الله يبشبش المخدة اللي تحت راسه – يبيع مساحات ضخمة جدا من الاراضي لرجال اعمال كبار في الدول العربية .. لكن الوضع اتغير بعد 2011 .. فتم ايقاف حق التملك للاجانب وفسخ العقود بقضايا متعدده بعد الثورة .. وفشل مشروع توشكى فشل ذريع .. وده كله لان الاهالي هناك تم تهميشهم .. لانهم هم اولى باراضيهم .. وده مقترح كذا حد دلوقتي لتفادي تفاقم الازمة خصوصا ( نجيب ساويرس ) و( ممدوح حمزة ) ومش هتصدقوا مين كمان ( مصطفى بكري ) !! مشروع توشكى : http://thawra.in/L1SbV

مقترحات الحلول : http://thawra.in/HH2M0  http://thawra.in/EY4lt

في اول فترة حكم السيسي كان فيه معاه شوية ناس اعتقدوا ان ممكن المرحلة يكون فيها خير واقترحوا مقترحات لتنمية ارض النوبة .. خاصة وانها من اخصب اراضي مصر بالاضافة لانها اكثر الاراضي المصرية المشهورة باستخراج معدن الذهب .. اسم النوبة اصلا باللغة النوبية يعني ( بلاد الذهب ) ..  اتسمع كلام الناس الحلوة دي ساعتها وتم وضع بند في الدستور الجديد لصالح اراضي النوبة .. وان أي حاجة هتتعمل هتكون مع الاهالي رأسا .. وبالتالي تعويضهم عن ظلمهم على مر التاريخ .. لكن الصراحة الكلام ده طبعا مش وقت الزنقات الاقتصادية للحكام ذوي النفوس المتضخمة .. اللي يفضل الواحد فيهم يوعد ويضخم في الاماني .. ولانه معندوش الية .. وكمان رضا شعبه عنه مش مهم .. فبيتعثر وبيبلبس انهيارات اقتصادية .. وبيضطر في النهاية يبيع اعز ما تملك دولته لأي شاري ..  مادة 236 من الدستور الجديد والخاصة باهالي النوبة :http://thawra.in/iu0WU

طب هل فيه رد من الزياطين غير الزياط الطبيعي وهو ان اي حد يتظاهر يبقى اخوان .. اه فيه .. واكذوبة جامدة بتلف صفحاتهم وبروفايلاتهم دلوقتي .. اسمع ياسيدي .. بيقولولك ان القوى العالمية الشريرة بتدعم ثورة اهل النوبة عشان منطقتهم المليانة دهب بحصيلة 20 % من دهب العالم .. ولما مصر اتحركت باتجاه اراضيهم قاموا واتحدوا الدولة تنفيذا للمخطط الخارجي .. طب بالذمة الكلام ده لو صحيح وقدر يبلعه اصغر عقل فيهم .. طب ليه هيدوها للعرب والاجانب بحق انتفاع 30 سنة يكونوا خلالهم استخرجوا كل الدهب اللي في الارض !!!

نص البوست المتداول : http://thawra.in/zEz50

أخيرا .. كل التحية والتقدير لأهالي النوبة الطيبين الكرام .. ففي عز ما الدولة بتتحكم بالحديد والنار .. وخطة الاخلاء وبيع الاراضي بيشرف عليها الجيش رأسا وبقرار جمهوري واجب النفاذ .. لكن النوبيين طلعوا وقالوا لأ أرضنا مش للبيع .. الدور والباقي على المعاتيه والسفلة اللي طبلوا للنظام في بيع الارض ولما المحكمة قالت كلمتها قالوا قائدنا ويعرف اكتر مننا .. تبا لكم جميعا .  #النوبة #قافلة_العودة

شارك برأيك

التعليقات المنشورة لا تعبر عن رأي الثورة اليوم وإنما تعبر عن رأي أصحابها

دوائر التأثير

الاشتراك في التنبيهات
اشترك في التنبيهات ليصلك كل جديد و متميز من موقع الثورة اليوم